-->

مستجدات فيروس كورونا وأهمية اللقاح

مستجدات فيروس كورونا وأهمية اللقاح

(وما أوتيتم من العلم إلا قليلا)
بعد متابعة المئات من حالات فيروس كورونا المستجد .


                                    
المراجعة النهائية قبل الموجة التالتة
١- فيروس كورونا بيتحور على الاقل مرتين كل شهر.
دراسة انجليزية اثناء تحليل السلالة الجديدة في انجلترا اكتشفوا الصيف اللي فات انه ده التحول رقم ٢٣ منذ اول حالة مكتشفة في الصين، فا الڤيروس اللي موجود عندنا - النهاردة - متحور حوالي ٣٠ مرة عن اول ڤيروس في ووهان. التحورات دي طفيفة على سطح الفيروس لكن چيناته وخصائصه الداخلية مازالت نفسها فا اللقاحات مازالت تقدر تتعامل معاها

٢- تحورات الڤيروس دي رغم انها طفيفة و خارجية الا انها أدت الى ظهور اعراض و تفاعلات جديدة للڤيروس في الجسم، الاعراض الجديدة تشمل:
- ألام في العين
- طنين و حرقان في الأذن
- سيلان في الانف (على العكس من الكحة الجافة زمان)
- و مشاكل جلدية مثل الحكة و البقع الحمراء كإنه دور حساسية.
الحاجات دي ماكانتش موجودة في ٢٠٢٠ خالص بقى.
ده حتى العلامات الاساسية اتغيرت، يعني في الاول كنا نجزم ان الحالة دي كورونا عند وجود حمى و ضيق في النفس. دلوقتي ممكن ماتلاقيش حمى ولا مشاكل تنفس. بس تلاقي صداع غبي و عميق. و تقل في الاكتاف. دي المؤشرات الجديدة
٣- كورونا الصعيدي غير كورونا البلد، بجد،
الاتنين ماشيين رحلتين غير بعض تماما.
اثناء انحسار الموجة الاولى في القاهرة كان في ذروة في الصعيد و لما بيكون في ذروة في القاهرة بتلاقي مفيش كورونا في الصعيد
و دلوقتي احنا لسه على اعتاب الموحة التالتة بينما هناك ذروة في الصعيد و مابقيناش عارفين حتى دي ذروة الموجة التالتة ولا التانية اساسا.

٤- في حوالي ٤٥٠ مليون انسان تلقى التطعيم. يعني نص مليار من اصل ٦ مليار بني ادم اتطعموا. فا لو كان في حاجة غلط في اللقاحات كنا عرفنا كلنا. او كنا موتنا كلنا تحديدا
تلك اللقاحات لاتمنع الاصابة، لكنها تمنع المعاناة، فعند اصابتك لاقدر الله بعد مرور شهر كامل على جرعتي التطعيم وقتها لن تشعر بأعراض شديدة او ستشعر انه دور برد
بعد ١٥ مليون جرعة لقاح في انجلترا انخفضت الوفيات و الحالات الحرجة بنسبة ٤٠٪؜ فا بقى اللي موجود بس اصابات خفيفة، و ده اللي احنا عايزينه من اللقاح؛ تقليل الوفيات و تقليل الحالات الحرجة و تقليل الاعراض فا لو اتصابت ماتحسش اوي.
هاديلك مثال تاني. الناس اللي بتاخد تطعيم الانفلونزا الموسمي، هل مابيحيلهاش برد خالص طول الشتا؟ بيجيلهم بالتأكيد. بس الانفلونزا العنيفة بتيجي معاهم بشوية رشح و زكام و شكرا. لان دمائهم تحتوي الاجسام المضادة التي تمكنهم من مقاومة الڤيروس اسرع. و ده غرض اللقاح.
٥- في حاجة تانية بتخفف الاعراض اثناء الاصابة. الحِمل الڤيروسي. كمية الڤيروس اللي دخلت جسمك اثناء الاصابة. الشخص اللي ملتزم بالكمامة وبيبعد عن التجمعات، في حالة اصابته فسيصاب بكمية خفيفة جدا لانه كان واخد احتياطاته لحظة العدوى. فغالبا ممكن يمرض و يخف من غير مايحس اصلا. انما الشخص اللي مش لابس كمامة، وواقف في مكان زحمة، لو عطس جنبه مريض كورونا، ربما ينتهي الحال به في غرفة عناية مركزة. لانه لحظة العدوى أصيب ب حِمل ڤيروسي عالي High Viral Load و ده كان ملخص دراسة صينية عن العلاقة بين الحِمل الڤيروسي و شدة الاعراض.
فعشان نكون واقعيين، الكمامة و التباعد واللقاح لن يمنعوا الاصابة، لكنهم ضروريين جدا للحفاظ على حياتك. احمي نفسك من شدك الاصابة قدر المستطاع، خد بالاسباب يا اخي عشان ربنا يحميك.
المرة ماحدش هايقوللك اقعد في بيتك بالعافية اذا كنت مش حابب تلتزم، المسئولية فردية. فا لو ماكانش عندك المبادرة لاتخاذ قرارات زي لبس الكمامة و تجنب الازدحام، ماحدش هايساعدك. هاتلاقي الباب مفتوح واللي عايز ينزل ينزل واللي عايز يخالط يخالط. بس لو اتصابت ماحدش يعرفك. فا حافظ انت على نفسك ماتستناش حد يمنعك بالعافية. احنا مش اطفال، احنا المفروض نكون قدوة جيدة لاطفالنا. خطط جيدا كيف ستحافظ على نفسك و على اهلك ولا تهمل ذلك في الذروة القادمة.
TAG

عن الكاتب :

ليست هناك تعليقات

إرسال تعليق

الاسم

بريد إلكتروني *

رسالة *